Groëtvenlo: twintigmeitwiedoëzendacht
Hiëre cônfrères, oftewaal... gewoën kaokvrinde, Ein twiëfelachtige reiskemissie...
Ein twiëfelachtig weekend...
Ein twiëfelachtige bestumming...
Ein twiëfelachtig programma...
Ein twiëfelachtige slaop akkomodatie...
De reiskemissie geit neet geliëk met ôg weg... ziër twiëfelachtig! Toch wille weej as reiskemissie ôg euverhaole um van zaoterdaag 31 mei tot en met zôndaag 1 juni, allebei dit jaor, met ôs mei te gaon. Geej heuf neet aan te kômme met ein of ander rotsmoesje det geej neet kint of genne tiëd heb, want weej hebbe kôntakt gehad met ôg maedjes en die ziën allang blie det geej ein paar daag de hort op kint gaon.
Veur Leo hebbe weej Mam gebeld, veur Gé hebbe weej Pap benaderd en de Waus en de klup van ut Hanekiene vônde ut allang prachtig det ouk Bert eine paar daag neet in Venlo zoel ziën. Diana had ut ouk veur Joop erg liërzaam gevônde, maar helaas... de Europese vliegtuig-maatschappijen maken ut neet meugelijk det Diana ouk ens ein leuk weekend haet.
Geej môt zaoterdaags um uëterlik 09.00 oor vertrekke vanaaf ut kerkplein beej de Antoniuskerk in Bliërick (dit geld ouk veur ôs gewaardeerde afdeiling Lomm). Ut is belangriëk det d’r langs de chauffeur eemes geit zitte dae, kint laeze, redelikke auge haet, en veural neet al te dauf is. En ouk belangriëk... dae dezelfde taal sprik as de chauffeur! Want geej kriëg van ôs eine veurgeprogammeerde TomTom wao de eindbestumming op steit.
Ogge reistiëd zal 2.1/2 tot 3 oor zien. Ut is ouk gemekkelik as geej eine reisleider aanwiës dae kint telle, want geej môt probaere um met 9 persoëne te vertrekke. Og chauffers zien ôzze chef Donné Perrée en de baetere helft oët Lomm, Wilfred Kessels dus. (of geej môt ein buske geregeld hebbe, maar weej weite neet of det binne de begruëting velt). D’r môt d’r minstens eine per auto ziene opgelaajde mobiele tillefoon meineme, en dao natuurlik ouk mei um kinne gaon, want um 11.30 môt geej de reiskemmissie belle op André ziene mobiele tillefoon 0031.06-18550734 (dae neet mobiele van thoës haet Gertie zellef nuëdig) waonao weej ôg ut letste stökske van de reis probaere oët te legge. Weej hebbe op zaoterdaagmiddaag ein klein programmaatje maar gaon in elk geval ’s aoves in ein echt echt restaurant ein vörkske prikke met ein verrassing. Zondaags gaon weej op tiëd weer truuk um in ut begin van de middaag nog wat sportiefs te doon en daornao um ongeviër 17.00 oor weer truuk in Venlo te ziën zoëdet de chauffeurs d’n auto weg kinne zette um daornao gezellig onder ut genot van (weer) inkele alcoholische versnaperingen ut weekend aaf te sloëte. De reiskemmissie (dit jaor en daornao noëijts miër !) - André, Loek en Hay. P.S. Geej heuf gen boëtelandse valuta te haole want alle landen wao weej kômme hebbe de euro. Zoëas aafgespraoke op ôzze letste kaokmiddaag môt geej natuurlik waal genôg euro’s meineeme want volges de reiskemmissie spare weej te weinig of hebbe weej te deure reisjes! Umdet weej de euvernachting gereserveerd hebben die leet tösse ein 5 sterren hotel en ein tent, môt geej waal zelf zörrege veur washendje, badhanddeuk, ein stökske zeip en misschien ein bietje shampoo. Eine douche hebbe weej veur ôg geheurd. Geej zult ut misschien neet geluive maar bedlinnen hebben weej nog net waal kinne regele. Ein zaklamp met gooije batteriëje zoel daorum misschien ouk hendig ziën um mei te neeme!